هل يولد الطفل عبقريًا ومميزًا؟


سؤال جدلي مشهور، هل بخ وبيتهوفن وفان جوغ واينشتين واي انسان عبقري فى مجاله مولود بموهبه فطريه ام ان تميزهم كان نتاج الاف الساعات من العمل الجاد.

لازار بولجار Lazar Polgar كان له رأي واعقبه بتجربه فى هذا الموضوع تستحق ان تروي: لازار من المجر يعمل مدرس ودارس لعلم النفس واصول التدريس، اهتم بموضوع قدرات الاطفال وشغله سؤال العبقريه ودرس حياه مئات العباقره ووصل ان هناك عامل مشترك فى حياتهم، انهم بدؤوا مبكرا جدا العمل على نقطه تميزهم، ومبكرا هنا مقصود بها 3 او 4 سنين،

والنقطه الأخري ان هؤلاء العباقره يقف خلفهم ويدعمهم من نقطه الصفر اباء او امهات او رعاه او احد متبنىيهم، لازار لم يقف عند القراءه والاستنتاج وقرر اسقاط قراءته على الواقع ولم يجد احسن من ان يربي ابناء كعباقره To Raise a geniusهو قرر

لازار لم يتزوج الى الأن، قرر ان البحث عن زوجه تشاركه حياته مبنى على اقتناعها وتحمسها لتجربته، سنكون اسره هدفها تربيه عباقره، بدء يدور ويتكلم لحد ما وصل لمدرسه لغات عايشه فى اوكرانيا اقتنعت بفكرته واتجوزا،

وجاتلهم سوزان اول مولوده، والشغل بدء معاها من سن ثلاث سنين ونص تقريبا، اتفقوا انهم هيركزوا على الحساب واللغات، جنب اللغه المجريه لغتهم الأم بدؤوا يعلموها روسي، فى الوقت دا فى السبعينات المجر كانت تابعه للاتحاد السوفيتي، ثم دخلوا عليها انجليزي والمانى بعدها،

سوزان وهى بتلعب فى البيت شافت قطع الشطرنج عجبها شكلها وقعدت تلعب بيها فالأب اخد الخيط وعلمها شطرنج وهى اربع سنين،

بدء معاها بالتدريج خالص، اللوحه فاضيه يعلمها اسماء المربعات ثم يدخل قطعه واحده زي الملك ويعملها حركته ويلعبوا ملك ضد ملك بس ثم بعدها يدخل قطعه اخري وهكذا، البنت عجبتها الشطرنج وحبت تلعب كثير، الأب والأم دخلوا الشطرنج فى منهج العباقره بتاعهم ، بقيت شغاله حساب ولغات وشطرنج.

الأب اخدها نادي شطرنج وهى عندها خمس سنين ونصف، رواد النادي افتكروا اب جايب بنته تقعد حواليه وهو بيلعب، لكن الصدمه انه كان عايزها تلاعب رواد النادي الكبار،

سوزان بدأت تدخل بطولات الناشئين وتكسبها كلها والبطولات النسائيه وتكسبها كلها، فالأب بدء يضغط على اتحاد الشطرنج المجري انها تدخل بطولات الرجال، ومع الوقت بقيت الشطرنج هى مجال عبقريتها ، سوزان هتبقى اشهر واقوي امراءه تلعب الشطرنج فى التاريخ،

سوزان وصلت انها ثالث امرأه تاخد لقب Grand master بشروط تأهيله للرجال واول امراه تؤهل انها تلعب فى بطوله العالم للشطرنج للرجال كنقاط وهزمت اسطوره الشطرنج الروسيه kasparov وفضلت 23 سنه على قمه تصنيف الشطرنج للنساء ما بين المركز الاول والثانى والثالث ،

سوزان وصلت لقمه التصنيف العالمى للنساء وهى عندها 15 سنه بس، اخدت بطوله العالم للبنات تحت 16 سنه وهى عندها 12 سنه. واضح ان قناعات صديقنا لازار نفعت والتجربه تم اثباتها على الواقع، الأجمل ان بعد سوزان هذه العائله خلفوا بنتين كمان والأثنين برضوا بقوا ابطال شطرنج عالميين وحققوا نفس نجاحات اختهم ، من وهما 9 سنين بيلعبوا فى بطولات عالميه للكبار ومصنفيين عالميين وقوه لا تقهر واصبحت عائله بولجار Polgar family قوة لا تقهر وظاهره عالميه فى الشطرنج.

الأخت الاصغر judit حققت لقب grand master وهى عندها 15 سنه وكام شهر وكسرت الرقم القياسى لاسطوره الشطرنج الأمريكي bobby fischer

علشان نتخيل شكل الانجار، الشطرنج كلعبه هى لعبه ذكوريه بامتياز، كل المشهورين والأبطال رجال، والى الأن عدد النساء الحاصلين على لقب grand master نسبه للعدد الاجمالي لا يتجاوز 2.5%

ولو شوفت التصنيف العالمى بالنقاط هتلاقى فجوه كبيره بين الرجال والنساء الأن فتخيل شكل الفجوه فى السبعينات. لفتره كبيره كانت بطولات الرجال مختلفه عن بطولات النساء، وكان فيه جدال مستمر، دى لعبه عقليه مش معتمده على قوة بدنيه ، يبقى ليه نفصل بين الاثنين ، لحد ما اللعبه وصلت ان بطولات الرجال ممكن نساء يلعبوا فيها، ويفضلوا يعملوا بطولات نساء، ودي احسن تسويه علشان لو معملوش بطولات منفصله للنساء، مفيش اي امراءه هتاخد بطولات وتمثيلهم هينزل لاعداد قليله جدا


نرجع للأب لازار صاحب التجربه، لازار ألف كتاب اسمه Raise a genius ، لكن الفه باللغه المجريه ولم يتم ترجمته بشكل رسمي لكن هناك ترجمه غير رسميه بيحكي فيها عن قناعته وتجربته مع بناته الثلاثه،

لازار دخل خناقات كثير علشان تجربته وبناته، وهو مدرس وعامل اثنين بكالريوس واحد فى علم النفس والثانى فى التدريس وبعدين دكتوراه فى بناء قدرات الاطفال - وصل لقناعه ان نظام المدارس مصمم لاخراج ناس عاديه متوسطه mediocre وان لو بناته كملوا فى مدارس مش هيقدر يخليهم عباقره، فقرر يقلبهم تعليم منزلي، دوله المجر كانت شيوعيه تابعه للاتحاد السوفيتيى وقبضه قوية، كان ممنوع التعليم المنزلي، هو دخل معركه وقعدهم وقدم عرائض وطلبات وان بناته مميزين ودا هيأثر عليهم وكان هيتسجن، وبعد خناقات اخد استثناء انهم يقعدوا فى البيت لكن يمتحنوا اخر السنه وقد كان،

دخل خناقات طويله مع اتحاد الشطرنج المجري، لفتره كانوا رافضين اعطاءه هو وبناته باسبورات علشان يسافروا يمثلوا البلد فى بطولات شطرنج عالميه، ورافضين انهم يكونوا ممثل رسمي للبلد ورافضين فكره ان البنات تلعب فى بطولات رجال لكن هو فضل مكمل فى كل المعارك دي لسنين لحد ما كسبها،

هو تفرغ هو و مراته لتربيه وتعليم البنات، فى كتابه بيقول ان الاتجاه ان الأباء والأمهات بيعملوا تعهيد كامل outsourcing لمهمه التعليم للمدارس وان دا غلط ، ولازم يكون ليهم دور كبير فى تعليم ولادهم، مقدرتش اوصل هو كان بيصرف ازاي على العائله وهل فعلا استقال بشكل كامل ولا كان شغل شغل جزئي ، هو فى فتره لما شهره العائله وبناته كبرت فى رجل اعمال المانى تبناهم، لكن الأب بيحكى فى كتابه انهم كانوا متقشفين ، مفيش عربيه ، مفيش شراء مصيف ،

وان اغلب الفلوس كانت بتروح لشراء كتب ومواد تعليميه للشطرنج واللغات، كان عندهم مكتبه فى البيت فيها كذا الف كتاب للشطرنج، كانوا يوميا بيقضوا 4 ساعات شطرنج بين لعب ومذاكره ومراجعه وباقى اليوم للغات والحساب وبعدين لعب مفتوح، البنات كانوا بيحبوا السباحه وتنس الطاوله جنب الشطرنج.

سوزان البنت الكبيره كانت بتعرف 7 او 8 لغات ، مجري اللغه الأم – روسي – انجليزي – المانى – عبراني – اسبانى – ايطالى وباقى البنات نفس الكلام، والأم ساعدت فى الجانب دا علشان كانت بتعرف 4 لغات ومتخصصه فى تعليم اللغات ، وهو مقتنع ان تعليم اللغات بيفرق بقوة فى القدرات العقليه للشخص،


وانت تقرأ هذا الكلام غالبا هيدور فى ذهنك تساؤل، هل هو اب مهووس بيطلع عقده على بناته، والبنات طلعوا معقدين ولم يمارسوا طفولتهم بشكل طبيعي، دا تساؤل كان حاضر لأي صحفى او اكاديمي بيكتب او يقيم تجربه polgar family وكان فيه هجوم عليهم فى صحافه بلدهم لهذا السبب

لدرجه ان فى صحفيين راحوا سألوا جيرانهم واصحابهم، والكتاب بتاع lazar الأب كان على شكل حواري مع صحفيه سألته نفس السؤال،

انا اول لما قريت عن العائله كان فى ذهنى هذا التسائل ودخلت على اليوتيوب اشوف فيديوهات للبنات وهما بيتكلموا وشكلهم ووصلوا لإيه دلوقتى، نبدأ ببعض الصحفيين والاكادميين اللى قابلوا محيط العائله واحتكوا بالبنات نفسهم، الانطباع والرد انهم اسوياء نفسيا سعداء بحياتهم ليهم اهتمامات اخري وسعداء بتجربتهم، الأب لما اتسأل، قال اي حد بيفهم فى علم النفس لو قعد اتكلم معاهم وشاف عينهم وطريقه تعبيرهم هيعرف انهم عايشين حياه مستقره وسعيده ودا هيكون انطباعك غالبا لو شوفت فيديوهات ليهم،

زى ما حكيت فوق، هما كانوا بيلعبوا سباحه ، تنس طاوله، بيخرجوا فى حدائق وليهم اصحاب وحياه طبيعه زي اي اطفال، اللى ساعد ان الشطرنج مجال عبقريتهم جزء منها هى لعبه فيها تنافس ومتعه.


لماذا اختارت Polgar family مجال الشطرنج انه يكون نقطه التميز والعبقريه؟ ممكن يكون صدفه ، لكن هما شايفين انه مجال فيه مميزات كثير الشطرنج شىء objective يا كسبت يا خسرت، خصوصا وهى بنت ، لو كان مجال موسيقي او فنون او رسم ، كان ممكن يتم تقييمها بشكل اقل بسبب خلفيتها كبنت وهما عائله يهوديه، لكن الشطرنج يا ابيض يا اسود،

زائد ان الشطرنج جزء منه لعبه فيها روح التنافس وجزء منها علمى فيه خطط ومذاكره واحتمالات واستراتييجي وجزء منها فن، طريقه لعبك وانعكاس شخصيتك علي لعبك فى خلفيه اخري للشطرنج ، ان المجر كانت تابعه للاتحاد السوفيتيى – والسوفيت كان فيه هوس بالشطرنج كلعبه،

فى السبعينات لما طلع البطل الأمريكي bobby fischer وانهي هيمنه الروس على اللعبه ، كان اتحاد الشطرنج الروسي مسجل فيه 4 مليون شخص ، واحد البطولات اللى نظمها كان مشترك فيها 700 الف ، والدوله بتدعم اللعبه وموجوده فى المدارس ونوادي الشطرنج فى كل الاحياء ، على الجانب الاخر من المحيط فى امريكا كان عدد المسجلين فى اتحاد الشطرنج لا يزيد عن خمسه الاف شخص بس.

ليه الشطرنج كان ليه وزن كبير فى الاتحاد السوفيتي؟

فى كلام انه بسبب الجو البارد طوال العام، فمحتاجين لعبه تنفع تبقى indoor وانها لعبه غير مكلفه لا تحتاج ملاعب وزي وتغذيه وادوات ، وممكن تتلعب فى اي مكان، على القهوة وفى المطعم وفى البيت وفى المصيف،

احد الاسباب المذكوره ان الجيش السوفيتيى كان بيستخدم اللعبه فى تدريب جنوده على فنون الحرب، وان lenin كان محب للعبه، وان الحزب الشيوعي كان بيستخدمها كوسيله لرفع الوعي لدي العمال، تعددت الاسباب والنتيجه ان الروس مهيمنين على اللعبه من عشرات السنين.


رغم ان الثلاث بنات تميزا فى الشطرنج ووصلوا لقمته العالميه والتاريخيه، لكن كان فى اختلافات شخصيه بينهم، البنت الوسطانيه كانت اكثرهم كسلا واقل صبرا ، رغم ذلك هى وصلت لرقم 6 فى التصنيف العالمى وحصلت على لقب Grand master وهي صغيره جدا

الثلاث بنات الأن متجوزين وعندهم اطفال وبطلوا يلعبوا بشكل احترافي – لكن لسه ليهم علاقه بالشطرنج كتدريب و تأليف و رعايه.


اخيرا عائله Polgar عائله يهوديه ، الأب حكى ان فى فتره فى حياته مدرس زميل اقنعه بالماديه والحد، اغلب العائله هاجروا اسرائيل بعد ذلك ماعدا البنت الكبري سوزان اتجوزت واحد امريكي واستقرت هناك.

فى كتابه ذكر نقطه عن اليهود كأقليه، انك تولد كيهودي بيخلي فرصك انك تاخد جائزه نوبل 100 ضعف اي ديانه ثانيه، نسبه الحاصلين على نوبل من اليهود حوالى 22% ونسبه اليهود فى العالم هى 0.2%

هو اطرح عليه سؤال هل تفوق اليهود فى الجوانب العقليه دليل علي تميز جينى ام بسبب اجتماعي – وهو رجح ان دا ب

سبب اجتماعي ان اي اقليه دائما بتحس بالتهديد فبتحاول تبقى متفوقه، وعلشان هما تحت تهديد دائم بالترحيل وترك المكان، فالتعليم والامكانيات العقليه هترحل معاهم زائد انهم بشكل مادي بيحاولوا يكون املاكهم فى شكل دهب والماظ علشان سهل ترحل معهم،


ملخص تجربه Polgar family اللى هو اثبتها بنفسه على بناته Geniuses are made, not born اختار مجال واحد. ركز فيه جامد وابدأ مع اطفالك من وهما صغيرين جدا. استثمر وقت كبير يوميا فى تنميه وتدريب هذا المجال. ولادك هيكونوا عباقره فى هذا المجال.


لو عايز تعرف اكثر عن Polgar family وتجربتهم

1- فيلم وثائقى انتجته National geographic اسمه My brilliant brain

2- كتاب الاب Lazar polgar – Raise a genius

http://slatestarcodex.com/Stuff/genius.pdf

ملحوظه : الترجمه ليست رسميه والكتاب مليء باراء شخصيه للأب فى كل ما حوله من الحياه، سياسه ودين وتربيه ...الخ

3- هناك فصل عنهم فى كتاب Ultralearning – Scott young ودي كانت اول مره اسمع عنهم وانا اقرأ هذا الكتاب


هذا الموضوع اشتغلت عليه الدراسات بشكل معمق، هناك آراء تقول أن الصفات الشخصية من الوراثة والجينات فقط ،و آراء تعتبره من تأثير البيئة والظروف المحيطة فقط تتكون الشخصية وليس هناك أي دخل للجينات . لكن في الحقيقة ذلك المزيج من علم الوراثة خبراتك وتجاربك الخاصة في العالم والحياة تشكل أيضًا مواقفك وسلوكياتك وهويّتك في نهاية المطاف.

بحيث يمكن أن تتغير العلاقة بين جيناتك وسلوكك بمرور الوقت لأن لديك تجارب جديدة. في بعض الحالات ، تلعب الجينات دورًا أكبر في تحديد سلوكك ؛ في المواقف الأخرى ، تلعب البيئة دورًا أكبر في التأثير على سلوكك.إذا كان لديك مجموعة مختلفة تمامًا من التجارب على مدار حياتك ، فقد يتم التعبير عن جيناتك بطرق مختلفة ، وقد تتصرف بشكل مختلف عن سلوكك الآن. كما أنّ هناك دراسات حديثة تؤكّد أن التعبير الجيني genetic code بامكانه أن يتأثر بالبيئة والتنشئة اقرأ المقال التاليthe social life of genes: Shaping Your Molecular Composition- لـ David Dobbs: https://psmag.com/social-justice/the-social-life-of-genes-64616

وبالتالي فهناك تداخل كبير ومعقّد بينهما. والرأي السائد والأشمل أنّ الوراثة والاستعدادات الجينية وكذلك البيئة بما فيه من مؤثرات ومتغيرات لها دخل وتأثير في الموضوع: شخصية الانسان = استعداد وراثي+تأثير البيئة.

أضف إجابتك

cloud_upload

جار الرفع... ({{imageUpload.progress}})

أرسل إجابتك كعضو
أرسل إجابتك كزائر

اطرح سؤالك على مجتمع التعلم واحصل على أجوبة من خبراء

الإشعارات

أغلق
جار تحميل المزيد
لا توجد إشعارات